Welfare scheme kalpui ṭha tawk lo : SC

Supreme Court chuan sorkar laipui hnenah welfare scheme hrang hrang a siam atan sum tam tham tak a seng chunga heng scheme te a kalpui ṭhat tawk loh chhan a zawt.

Justice MB Lokur leh Jutice Deepak Gupta awmna division bench chuan sorkarin welfare scheme atana sum tam tak a senral laia scheme kalpui dan ṭha si lo chu mak an tih thu an sawi a, hei hi mipuite chhiah pek sum tam tak khawhralna mai a ni, an ti.

Bench chuan sorkar laipui hnenah heng scheme-te a tihtawp lohna chhan a zawt bawk a, " Scheme ṭha tak ngaihtuah chhuak mah ula, hengte hi a taka inkalpui theih loh chuan eng vangin nge in siam kher?" tiin a zawt.

Sorkar laipui aiawhtu, Additional Solicitor General Atmaram Nadkarni chu mi rethei, chenna in pawh nei lote harsatna chinfel sak tura ruahmanna siamna kawngah court thawhpui turin an hrilh a, sorkar laipui leh state sorkar chu hemi chungchang hi ngaihtuah tawk lohah an puh bawk.

Bench chuan state sorkar in chenna in nei lote a ngaihtuah ṭhat a ngai tih a sawi a, Haryana leh West Bengal sorkar chu sorkarin in neilote chhawmdawlna tur scheme puala sum a pekchhuah an hman dan kimchang an thehluh loh avangin a sawisel bawk a ni.