Thermal Power Plant puak vanga thi 26 tling tawh

Uttar Pradesh-a Unchahar Thermal Power Plant puak vanga thi chu mi 26 an tling tawh a, mi 100 chuangin hliam an tuar bawk.

Rae Bareli district-a Unchahar-a National Thermal Power Corporation Limited plant-a 500-MW boiler (power generating unit) chu Nilaini zan khan puakin a kang zui a ni. He chhiatna thlen laia plant-a awm mi tam tak chuan hliam na tak tak an tuar a ni. Hliam tuarte hi Lucknow leh Rae Bareli hospital-ah hruai an ni. Hliam tuar zingah hian assistant general manager rank official pali an tel.

Chhiatna thlenna hmunah hian tualchhung thuneitute leh NTPC official-te chu an kal nghal a, chhanchhuah hna thawk turin Provincial Armed Constabulary (PAC) company pahnih tirh an ni bawk.

Prime Minister Narendra Modi chuan plant-a chhiatna thleng chu pawi a tih thu a sawi. Mauritius-a ni thum cham tura zin mek, UP Chief Minister Yogi Adityanath-a pawhin Principal Secretary, Home hnenah harsatna tawkte ṭanpui hna thawk tura a theih anga hma la turin a hriattir nghal a ni.

CM chuan plant puak vanga hliam tuarte enkawlna senso chu state sorkarin a tum vek tur thu a sawi a, thi chhungte chu cheng nuai hnih ṭheuh, hliam tuar na zualte chu Rs 50,000 ṭheuh leh hliam tenaute chu Rs 25,000 ṭheuh pek an nih tur thu a puang bawk.

Congress vice president, Rahul Gandhi chuan Gujarat-a Navsarjan Yatra a neih mek pawh chawlin, chhiatna thlenna Rae Bareli hi a tlawh a, plant puak vanga hliam tuar leh thi chhungte a tlawh a ni.

Chhiatna thlenna, Unchahar Thermal Power Plant aṭang hian power MW 1,550 siamchhuah niin, state pakuaah power a pe chhuak a, thawktu 870 an awm mek a ni.

UP sorkar chuan power plant puah chhan hi chhui chiang a, ni sarih chhunga report thehlut turin thupek a tichhuak. Plant-a chhiatna thlen dan chhui tur hian member pahnih awmna technical team din nghal a nih thu Principal secretary Arvind Kumar chuan a sawi.

NTPC hi ramchhunga power siamtu lian ber niin, an hmunhmaah hian chhiatna a thleng khat hle. Unchahar plant hi April thla aṭang khan hman ṭan a ni a, mahse chhiatna a thlen hnu hian khar nghal a ni. NTPC pawhin thuchhuah siamin, chhiatna thlen dan hi a hrana an chhui chian tur thu a sawi.