Congress, NC leh J&K Apni Party ten J&K state puitling ni leh turin duh
Congress, National Conference (NC) leh J&K Apni Party chuan Jammu & Kashmir chu state puitlinga dah leh turin sorkar laipui an ngen.
J&K-a Peoples Democratic Party (PDP) chuan a tir aṭangin sorkar laipuiin J&K-in special status Article 370, 35A leh statehood a neih a laksak chu vawiin thlengin a la do ngar ngar a, PDP senior leader Firdous Tak chuan nikum August 5-a sorkar laipuiin a tih tawp Article 370 neih let leh an dikna hrang hrang neih let a duh thu a sawi.
J&K Congress hotu Ghulam Ahmed Mir chuan an party-in sorkar laipui hmalakna hi an dodal thu leh an party chuan J&K chu state pek let leh an duh tih a sawi. J&K Apni Party chairman Altaf Bukhari pawhin J&K chu state-a siam leh turin sorkar laipui a ngen bawk a, J&K mite dikna chanvo pe let turin a duhthu a sawi bawk.
Sorkar laipuiin J&K special status a tihtawpsak hnuah J&K hi UT pahnihah a ṭhen a, sorkar hmalakna dodal thei tur zawng zawng chu hren zui an ni. J&K chief minister hlui, PDP president Mehbooba Mufti pawh hren zingah hian telin, vawiin thlengin Public Safety Act (PSA) hnuai la hren chhunzawm reng a ni.
Nikum August 5 khan Jammu & Kashmir state tana special status pekna, Article 370 chu tihtawp a ni a, hemi rual hian he article behchhana siam, Jammu & Kashmir-a cheng nghet (permanent resident)-te tana hamṭhatna pekna, Article 35A pawh tih tawp ve nghal a ni bawk.
Article 35A hnuaia hian permanent resident lote chuan J&K-ah hian ram leh in an lei leh an neih phalsak an ni lo.