Telangana-a Operation Lotus kalpuiah BJP puh; TRS-in lungawi lohna an lantir

Telangana-a rorellai, Telangana Rashtra Samithi (TRS) chuan central-a rorellai, BJP chu TRS MLA-te sum hmanga thlem chhuah tuma Operation Lotus kalpuiah an puh. Nilaini zan khan TRS minister leh hruaitute chuan state chhung hmun hrang hrangah lungawi lohna an lantir.

TRS hruaitute chuan BJP leh prime minister Narendra Modi laka an lungawi lohna thute au puiin, Telangana-a TRS sorkar chu paihthlak tumin an MLA-te chu sum tam tham leh post-te pek tiamin an thlem a ni, an ti.

Telangana police-te chuan TRS MLA palite sum hmanga thlem chhuah tum mi pathum an man thu an sawi bawk. Heng MLA pali - Guvvala Balaraju (Atchampet - SC), B Harshavardhan Reddy (Kollapur), Rega Kantarao (Pinapaka-ST) leh Pilot Rohit Reddy (Tandur)-te hian Hyderabad khawdaia farmhouse-ah suma lei tumtute hian an hreng tih an hrilh thu Hyberabad Commissioner of Police (CP) Stephen Raveendra chuan a sawi. Hemi hnu hian Cyberabad police-te chuan farmhouse hi dapin, MLA-te thlemtu nia puh mi pathumte an man a ni.

MLA thlem zinga pakhat, Pilot Rohit Reddy chuan anmahni thlemtute hian BJP an zawm loh chuan criminal case siamsak an nih tur thu te, Enforcement Directorate/CBI-in an dap tur thu leh, TRS party kaihhruai Telangana state sorkar chu paihthlak a nih tur thu pawh an sawi niin a tarlang.

Police-te an mante hi Delhi lam mi Ramachandra Bharati leh Tipurati mi Simhayajulu te bakah Hyderabad mi sumdawng Nanda Kumar-te an ni. Bharati leh Simhayajulu-te hi temple-a puithiam ve ve nia sawi an ni a, Kumar hi union minister G Kishan Reddy nena inhnaihvai tak nia sawi a ni thung. Bharati hi RSS nena thawkdun ṭha tak niin, Amit Shah leh BJP hruaitu dangte bulah hmuh a ni fo.

Heng mi pathumte hian TRS MLA-te hi an party chhuahsan tura thlemin, contract leh post-te an tiam bakah, Rs vbc 100 ṭheuh pek an tiam nia sawi a ni.

TRS hruaitute chuan Delhi lama BJP hotute chuan an party MLA palite hi a hma pawhin an lo be tawh niin an sawi a, zak lo taka sum hmanga mipui thlan sorkar paihthlak an tumna chu manchhuah an ni ta, an ti.

Hetih lai hian BJP chuan TRS puhna hi phain, thu dik lo a ni tih a sawi. Telangana-ah TRS-in majority a neih laiin sum tam takin MLA-te pawh hi thlemchhuah ni se awmzia a nei lo tiin, TRS chuan lem an chang a ni, a ti. He thil hi chief minister K Chandrasekhar Rao ruahman leh tihtir vek niin an puh bawk.