Congress President-in steering committee a din

Congress party president thar Mallikarjun Kharge chuan Nilaini khan Congress Working Committee (CWC) aiawh tur, member 47 awmna steering committee a din.

Steering committee member list hi party chuan tichhhuakin, an zingah hian president hlui Sonia Gandhi leh Rahul Gandhi bakah Priyanka Gandhi Vadra pawh a tel. Manmohan Singh, AK Antony, Jairam Ramesh, Randeep Surjewala, Ambika Soni, Ajay Maken, Harish Rawat, Abhisek Manu Singhvi leh Anand Sharma-te pawh an tel a ni.

Hetih lai hian party president thlannaa Kharge-a khingpui, Shashi Tharoor erawh steering committee-ah hian telh a ni lo thung.

CWC hi Congress party-a thuneitu sang, thil pawimawh zawng zawnga thutlukna siamtu a ni. Party president thar atana Kharge lakluh a nih hnuah, CWC member zawng zawng, general secretary leh in-charge te chuan hruaitu tharin team thar a dinna tur hian banna an thehlut vek a ni.

Kharge hi nakkum March-April-a party plenary session neih hunah, party hruaitu atana thlan a nihna hi nemngheh a ni ang. Plenary session zawhah CWC thar hi Kharge hian a siam dawn a ni. Party kalphung angin, CWC member 11 chu nominate in, member 12 chu thlan an ni thung ang. Mahse CWC thar siam a nih hma chuan strering committee hian a hnathawh ai a lo thawk rih dawn a ni.