PM Modi-a'n police tan 'One Nation, One Uniform' a rawt

Prime minister Narendra Modi chuan nimin khan state hrang hranga police-te tan kalphung in ang neihna turin 'One Nation, One Uniform' kalpui a rawt. Hemi rual hian hei hi ngaihdan a sawi chauh a ni a, intihluihna a awm lo a, mahse state sorkarte rawtna anga lo ngai turin a chah zui bawk.

Police tana 'One Nation, One Uniform' siam hi ngaihdan lo piang ve mai rih a ni. Hmang turin tihluih cheu ka tum lo a, mahse lo ngaihtuah zui ve ang che u. Kum 5, kum 50 emaw kum 100 hnua thleng thei chu a ni," tiin PM Modi chuan a sawi.

He thu hi nimina state home minister-te ho nena 'Chintan Shivir' an hmannaah a sawi a, ram chhung hmun hrang hrangah police-te chu nihna ang khata kalpui a ṭhaa a rin thu a sawi a ni.

Pawikhawihna leh pawikhawihtute buaipuina kawngah state hrang hrangten thawhhona ṭha tak an neih a ṭul thu Modi chuan a sawi. Union home minister Amit Shah-a'n law and order policy in ang tlanga hman a duh thu a lo sawi tawh chu a thlawp bawk.

Prime Minister chuan law and order chu Constitution hnuaiah state subject ni mah se, ram inpumkhatna leh famkimna tur nena inthlunzawm vek a ni, a ti. "State tinte ram himna thawhho chu ram danpuiin min phut ang leh, ram tana kan mawhphurhna a ni bawk a ni," tiin a sawi.

Central leh state agency-te pawh chak leh ṭha zawka hna thawh theihna atan, mipuite venhimna turtein ṭha taka an thawhho zel a ṭul thu Prime Minister chuan a sawi bawk.

State sorkar-te chu dan hlui tawhte chu ennawn a, a ṭul dan anga siamṭha turin a chah bawk a, thu dik lo thehdarh ṭhinte chu rang taka finfiah thuai a ṭul thu leh, hemi kawngah hian technology chuan chanvo pawimawh tak a neih thu a sawi. "Mipuite chu an thu dawnte an thehdarh hmain a dik tawk em tih fiah hmasa ṭhin pawh tura zirtir ṭhat an ngai a ni," a ti.