November 8-ah Jaishankar leh Lavrov-te inbe dawn

External affairs minister S Jaishankar leh Russia foreign minister Sergey Lavro-te chuan November 8-ah Moscow-ah meeting an nei dawn.

Russia foreign ministry thupuangtu, Maria Zakharova chuan minister pahnihte inbiakna an neih tur thu hi nimin khan sawiin, ram pahnihte inlaichinna chungchang bakah khawvel huap thil dangte pawh an sawidun dawn a ni, a ti.

Sergei Lavrov hian April thla khan India a rawn tlawh tawh a, Jaishankar leh prime minister Narendra Modi-te inbiakna a neihpui a ni. Russia president Vladimir Putin pawh nikum December thla khan India-Russia annual summit hmangin a rawn zin tawh bawk.

Ram pahnihte hi inṭhianṭha tak niin, an inzawmna leh thawhdunnate thlirin kumtin review meeting an nei ṭhin a, kumin hian PM Modi chu Russia-ah hian a zin rin a ni.

Russia defence minister Sergei Shogi chuan Nilaini khan defence minister Rajnath Singh rawn biaiin, Russia-Ukraine indona thleng mekah Ukraine-in 'dirty bomb' hman a tum nia an hriat thute a rawn sawipui. Hetih lai hian Rajnath Singh chuan Ukraine-a indona thleng mek chu inbiakna hmanga an chinfel theih thuai a beisei thu a lo hrilh a, nuclear ralthuam hman chungchang chu ram pahnihte chuan ngaihtuah lo sela a duh thu a hrilh bawk.