Pawisa note-a Lakshmi-Ganesh thlalak dah phuttu Kejriwal sawisel

Delhi chief minister Arvind Kejirwal-a'n pawisa note thar thlalakah Hindu pathiante thlalak dah a rawt chuan sawisel leh sawizui a hlawh hle.

Reserve Bank of India (RBI) central board director leh RSS leader, S Gurumurthy pawhin Delhi Chief Minister rawtna hi sawiselin, 'low-level politics' a khelh chu titawp turin a ti. Gurumurthu chuan Gujarat assembly inthlan a awm dawn avangin, Kejriwal chu hetiang rawtna awmze nei lo tak siamah a puh.

Pawisa note-ah Mahatma Gandhi thlalak emaw, midang thlalak emaw pawh dah ni se, India mite tan a hlutna a ngai reng a, Lakshmi thlalak lo dah khan a tihlu zual chuang lo, tiin Gurumurthy chuan a sawi.

Arvind Kejriwal thil phut chungchang hi twitter lamah pawh nuih zui leh, fiamthu thawhna atana hman zuina a tam hle.

Kejriwal hian Nilaini khan press conference a neihah pawisa note-a Laskhmi-Ganesh thlalak dah tura a duh thu a sawi chhuak a, nimin khan a ngenna hi prime minister Narendra Modi hnenah ziakin a thlen a, India mi vaibelchhe 130-te aiawhin he ngenna hi a siam tih a lehkhaah hian a tarlang.