Bihar-a zu khapna kalpui dan zirchiang

Bihar sorkarin an state chhunga zu khap burna dan a siam a kalpui dan zirchiang turin member 31 awmna, Karnataka State Temperance Board chuan nimin khan Bihar an tlawh.

Karnataka team hian Bihar Chief Minister Nitish Kumar hmuin, nikum April thla aṭanga state chhunga zu siam leh hralh khapna dan hman a nih dan leh, a hlawhtlin dante an sawipui a ni.

CM Kumar chuan zu khapna dan hi a tirah chuan a tahtawla kalpui chhoh an tum tih a sawi a, mahse kum 2016, April 1-ah khapna kalpui ṭan a nih khan zu zawrh chhuah chungchanga mipui lam aṭanga complaint te an dawn chhoh zel avangin April 5, 2016 khan state pumah zu zawrh leh hralh khapna dan hi hman nghal vek a ni ta tih a sawi.

Kumar chuan zu khapna dan siam anih vang hian state sorkar chuan kum khata zu chhiah aṭanga a sum hmuh, cheng vaibelchhe 5,000 zet an hloh tih a sawi. Mahse state mipuite'n kum tina zu man atana an sum senral, cheng vaibelchhe 10,000 zet chu thil ṭangkai leh ṭha zawkah an hmang tawh a ni, a ti.

Zu khap a nih aṭangin mipui nunphung pawh a changkan phah hle tih sawiin, Bihar CM chuan road accident leh pawikhawihna thleng ṭhin pawh a tlem phah niin a sawi bawk.