South Kashmir-ah firfiak 115 an awm : Maj Gen BS Raju

Victor Force hotu, Major General BS Raju chuan Kashmir chhim lamah firfiak 115 an awm mek niin a sawi a, heng zinga hian ramdang mi 15 an awm tel niin a sawi. Thla ruk kalta chung khan firfiak 80 thah an nih thu a sawi bawk.

Ningani zan khan J&K-a Samboora khuaah firfiak leh sipaite inbeiin, sipai pahnih an thi a, firfiak pakhat kahhlum a ni bawk. Firfiak kahhlum hi Jaish-e-Mohammed (JeM) member Badar nia sawi a ni.

Sipaite chuan Pulwama-a in pakhatah firfiak pahnih an biru tih thu an dawn bawhzuiin an bei nghal a, firfiakte beihnaah hian 50 Rashtriya Rifles, Special Operations Group, leh Central Reserve Police-te an tel.