US ambassador atan Kenneth Juster ruat

US Senate chuan voice vote hmangin India rama US ambassador thar atan Kenneth Juster a pawm.

Kum 62 mi, Kenneth Juster hi Indo-US civil nuclear deal siamna kawngah pawh mi pawimawh tak a lo ni tawh a ni.

Kumin January 20-a US President atana Donald Trump lakluh anih khan India-a US ambassador Richard Verma chu a bang a, a hmunawl hi hnawhkha lohin a la awm a ni. Juster hi tun thla tawp lama Hyderabad-a Global Entrepreneurship Summit (GES) hmang turin a rawn kal dawn a, he summit hi India leh US ṭangkawpin an huaihawt tur a ni.

September 5 khan India-a ambassador atan Juster hi rawt a ni a, State Department-ah Counsellor (acting), deputy leh senior adviser hna te a lo thawk tawh a ni. Havard University-a Weatherhead Center for International Affairs chairman, The Asia Foundation vice chairman te a lo ni tawh bawk. Havard University aṭangin law degree a nei a, John F Kennedy School of Government aṭangin Public Policy-ah master degree a nei bawk.