Gujarat rally-ah CM 3-in thu an sawi

Gujarat assembly inthlan neih tur atan political party hrang hrangte an campaign chho mek a, nimin khan chief minister pathum - Delhi chief minister Arvind Kejriwal, Punjab chief minister Bhagwant Mann leh Rajasthan chief minister Ashok Gehlot-te chuan rally neihna hrang hrangah thu an sawi.

Aam Aadmi Party (AAP) hruaitu Kejriwal leh Mann-te hian Zirtawpni khan BJP sorkar mekna, Gujarat-ah hian campaign turin an kal a ni. AAP hruaitu pahnihte hian nimin khan Bhavnagar district-a Palitana khua leh, Rajkot district-a Dhoraji khuaa rally neihah thu an sawi dun . AAP national convener Kejriwal hian tun hnaiah Gujarat hi a tlawh fo a, an party-in sorkarna an siam chuan state mipuite tana an tih tur hrang hrang pawh a lo tiam tawh a ni.

Congress hruaitu, Rajasthan chief minister Ashok Gehlot chuan nimin khan rally pathumah thu a sawi bawk. A ni pawh hi Zirtawpni khan campaign turin Gujarat-ah hian a zin a ni. Banaskantha, Sabarkantha leh Aravalli district-a rally neihnaah thu a sawi.

Gehlot chuan electoral bond kaltlanga party tana donation pek ṭhin zinga 95% zet chu BJP tan pek a ni tiin, donor-te chuan BJP an hlauh avangin party dang tan an pe ngam lo a ni, a ti. BJP chu Congress party leh party dangte hnena donation pek duh sumdawng liante vau ṭhinah a puh.

Gujarat assembly term kal mek hi kumin kumtawp hian a tawp dawn a, assembly inthlan hi buatsaih a nih thuai rin a ni. Tunkar chhungin Election Commission of India chuan Gujarat assembly inthlan neih hun tur hi a puang tawh dawn nia sawi a ni bawk.

PM-in ni 3 cham turin a tlawh
Prime minister Narendra Modi pawhin ni thum cham turin nimin khan Gujarat hi a tlawh a, a cham chhungin project eng emaw zat a hawng ang. Kevadia-a tourist spot pawimawh tak tur pahnih - Maze Garden leh Miyawaki Forest-te pawh nimin khan a hawng nghal a ni.

Maze Garden hi ram acre 3 chuanga zau niin, India ramah hetiang chi garden lian ber a ni. Shriyantra’ shape-a siam niin, thingṭiak nuai 1.8 vel phun a ni. Thingṭiak an phun zingah hian Orange Gemin, Madhu Kamimi, Glory Bovar leh Mehndi te an tel.

Miyawaki Forest hi Japanese botanist Akira Miyawaki technique hmanga siam niin, hun rei lote ramngaw chhah tak siam theihna tur a ni. Miyawaki method hmang hian ramngaw, tihdan phung pangngaia kum 20/30 chhunga siam hman hi kum hnih thum lekah siam theih a ni dawn a ni. He method hmanga thing ṭiak phunte hi an ṭhan dan pangngai aiin a let sawmin an ṭhang chak a, ramngaw pawh a let sawmthum vel zetin a chhah zawk thei niin an thuchhuah chuan an tarlang.