India-ah hnathawh nei lo an tam ber : Rahul Gandhi

Congress party hruaitu, Bharat Jodo Yatra nei mek Rahul Gandhi chuan India chu thil inmil lo tak, hnathawh nei lo, unemployment tamna ber a nih laiin, khawvela mi hausa tawntawte awmna a ni, a ti.

Yatra hi Telangana-ah nei mekin, Inrinni liam ta khan Mahubnagar district-a pungkhawmte hmaah Gandhi hian thu a sawi a, "Kum 35 chhungin tun hi India rama hnathawh nei lo, unemployment an tam lai ber a ni. Hetih lai hian khawvela mi hausa tawntaw pawh an awm bawk. Mi hausate chuan an tih ang apiang an ti thei a, prime minister Narendra Modi leh Telangana chief minister K Chandrasekhar Rao-te chuan an lo thlawp zel a ni," tiin a sawi.

Central-a BJP sorkar leh Telangana-a TRS sorkar chu sawiselin, Rahul Gandhi chuan Modi kaihhruai sorkarin mipuite tana ṭha lo policy a siamte chu TRS sorkar chuan a lo thlawp ve zel a ni, a ti. BJP chu ram chhunga inhuatna leh tharum thawhna thehdarhtu a ni tiin a sawi bawk.