PM Modi-a'n Mann Ki Baat vawi 94-na hmang

Prime minister Narendra Modi chuan thla tina radio programme a hman ṭhin, Mann Ki Baat vawi 94-na chu nimin khan a hmang.

Prime Minister chuan science and technology lama India ram hmasawnna leh, solar and space sector lama India ram chet ṭhat dante a sawilang. India chuan Diwali hma ni khan hlawhtling takin satellite 36 a kapchhuak tih sawiin, heng satellite kahchhuah hmang hian ramchhung hmun hrang hranga digital connectivity chu thuam chak a ni dawn a ni, a ti. Hmun kilkhawr ber berte pawh awlsam takin thlunzawm an ni thei tawh dawn tih a sawi.

India ram chuan traditional experience a lo neih tawhte leh modern science-te hmang kawpin, khawvelah solar energy aṭanga electricity siam chhuak tam ber ram zingah a tel tawh tih PM chuan a sawi. Sorkar energy-in ram chhunga mi rethei leh harsa zawkte nun dan a thlak danglam dante chu zir tham a ni, a ti.

Modi chuan India kaihhruaia environment venhim leh humhalhna tura khawvel huap mass movement, Mission Life (Lifestyle for Environment) chu ngaihven turin ram mipuite a chah bawk.