HP-ah PM Modi a campaign

State assembly inthlan neihna tur, Himachal Pradesh chu nimin khan Prime Minister Narendra Modi chuan tlawhin, election rally neihna a telpui.

PM Modi chuan sorkar hmasa, Congress kaihhruai chu sawiselin, mi retheite chawikanna tur cheng vaibelchhe 57,000 tichingpenah a puh. Modi chuan Congress sorkar hnuaiah mi retheite chawikanna tur sumte chu mi tam takin mahni hamṭhatna tura tihchingpenin eirukna a hluar hle niin a sawi. Mahse a kaihhruai sorkar-in policy a siam hmangin hetianga sum riral tur hi an veng thei ta a, hei hi Congress chuan ngaithei loin amah leh a kaihhruai sorkar chu na takin an beih phah niin a sawi.

Modi hian ni li chhungin Himachal hi ṭum thum a tlawh hman a ni. Assembly inthlan neih turah chuan BJP chu a chak ngei dawn niin a sawi bawk.

Hetih lai hian Himachal Pradesh Chief Minister, Congress hruaitu Virbhadra Singh chuan PM Modi chu Women's Reservation Bill a kaltlangpui theih loh chungchangah sawiselin, ram dintute tia a sawi hmeichhiate phatsanah a puh.

Congress President Sonia Gandhi chuan September 21 khan Prime Minister chu BJP-in majority a neihna, Lok Sabha-ah Women's Reservation Bill pass thuai turin alo nawr tawh bawk a ni. CM chuan an state-a women literary rate chu rampum huap ai pawhin a sang zawk niin a sawi. Sonia Gandhi pawhin kum 2010, March 9 khan Rajya Sabha chuan Women's Reservation Bill hi a lo pass tawh a, mahse Lok Sabha-ah hian chhuanlam hrang hrang vangin a la tang reng niin a sawi. Congress vice president Rahul Gandhi chu vawiin hian Himachal Pradesh-ah hian campaign-in a kal ve dawn bawk a, Ponta Sahib, Chamba leh Nagrota-ah rally a nei ang.

Himachal Pradesh hian November 9-ah assembly inthlan a nei dawn a, assembly seat 68 awmin, vote tlate hi December 18 ah chhiar a ni ang.