Rahul-an PM Modi bei chhunzawm

Congress vice president Rahul Gandhi chuan Prime Minister Narendra Modi chu a economic policy chungchangah a bei chhunzawm zel.

Rahul Gandhi chuan nimin khan social media kaltlangin PM hi a bei leh a, Modi chu a thusawi awmze nei lote chhunzawm tawh lo tura tiin, a thutiamte hlen tura thawk zawk turin a ti a, a thei lo a nih chuan bang mai turin a ti bawk.

Sorkar laipuiin thla 16 chhunga a ṭum 19-na atana subsidised cooking gas cylinder man a tihsan chungchang report tihchhuah a nih leh avangin Gandhi chuan a twitter kaltlangin PM hi a sawisel a, thil man sang zel khuahkhirh tur leh hna neilote tan hna pe zawk turin a ti a, a theilo a nih chuan bang zawk mai turin a ti a ni.

BJP chuan Rahul Gandhi hi a chhang let nghal a, BJP hruaitu Sambit Patra chuan Congress kaihhruai sorkar a din lai khan eirukna a hluar a, hna thar a siam lo a, mipuite hamṭhatna tur pawh a siam lo niin a sawi ve thung.

Rahul Gandhi hian tun hnaiah PM Modi leh a kaihhruai sorkar chuan a intiam anga ṭhalaite tana hna thar tam zawk a siam loh avangin a bei fo a, pawisa note lian pahnih tihthih leh Goods and Services Tax a siam chungchangah pawh na taka sawiselin, ram economy tihchhiaah a puh a ni.