Mukul Roy-an BJP a zawm

West Bengal-a rorellai, Trinamool Congress dintu zinga mi leh party Vice President hlui, Mukul Roy chuan BJP a zawm.

Mukul Roy hi union minister pawh a lo ni tawh a, Zirtawpni khan BJP a zawm thu hi a puang a, nimin khan sorkar laipui chuan Y+ category security a pe nghal a ni. A hmain Z+ category security pek ṭhin a ni. Z+ category hnuaiah hian venghimtu 55 pek an ni a, Y+ ah chuan mi 11 in an veng thung a ni.

September 25 khan Roy hian Trinamool Congress party hi a chhuahsan a, October 11 khan Rajya Sabha member aṭangin a bang a ni. A party zawm tur a tihchian mai loh hnuah, BJP a zawm thu hi a puang ta a ni. November 10-a Kolkata-a BJP mega party rally neihna turah pawh thusawi tur pawimawh zingah a tel a ni. Hetih lai hian TMC chuan Roy-an BJP a zawm hian an party leh Bengal-ah nghawng a nei lem lo niin an sawi thung.

BJP general secretary Sayantan Basu chuan an party-a Roy-a post tur chu high command lamin ala ngaihtuah dawn tih a sawi. TMC hruaitu eng emaw zatin Roy-a hnung hi zuiin, TMC an la chhuahsan dawn niin a sawi bawk.

Roy chuan a party thar, BJP chu a ringtawk tih sawiin, West Bengal-ah pawh sorkarna an chang thuai dawn niin a sawi. Prime Minister Narendra Modi-a hnuaia a thawk thei tur chu a inchhuang hle tih a sawi bawk. BJP chu sakhaw leh hnam tihbik nei lo a ni thu a sawi.