UP ATS-in IS firfiak rinhlelh man

Uttar Pradesh Anti Terrorist Squad (ATS) chuan Islamic State (IS) firfiak nia rinhlelh, Abu Zaid chu kar kalta Inrinni khan Mumbai Airport-ah an man.

Abu Zaid hi Saudi Arabia aṭanga a rawn haw chu airport-ah hian ATS team chuan an lo man nghal niin ADG (law and order) Anand Kumar chuan a sawi.

Kumar chuan Zaid hi Riyadh-a cheng niin, IS-a ṭhalai tam zawk hipluh tumin social media group te a siam tih a sawi a, Lucknow-ah hruaiin court-ah kalpui a ni dawn tih a sawi bawk.

Kumin April thla khan ATS chuan IS firfiak nia rinhlelh mi pali, Umar, Ghazi Baba, Mufi leh Jakawan-te chu an lo man tawh bawk a, heng mite thu an zawhfiahna aṭang hian Zaid hming pawh hi sawichhuah a ni. Hemi hnu hian Zaid hi man tuma zawn nghal a ni.