Gujarat-a lei chimah mi 141 an thi

Gujarat-a Morbi khuaah Pathianni tlai khan khan Macchhu lui chunga lei dawh a chim a, mi 141 an thi. Mi dang 10 chuangin hliam an tuar bawk.

He lei chim hi colonial era ami tawh niin, cable bridge a ni. Morbi municipal body leh Ajanta Manufacturing Private Limited chuan lei enkawl leh thuam ṭhatna tur hian contract an ziak a, a siamṭhatna atan hian thla 12 tal lei hi khar tura tih a ni. He lei hi Gujarat sorkar official website-ah tourist site lar tak nia tarlan a ni.

Mahse private company hian thla sarih hnu, Gujarati New Year an lawm ni, October 26 khan mipuite hman turin lei hi a hawng a, company hian civic authority aṭangin fitness certificate pawh a la lo nia sawi a ni. Thuneitu lam aṭanga phalna la hmasa loa lei hawn a nih dan hi hriatchian a la ni lo.

Ajanta hnuaia Overa Trust chuan lei zawh man hi mi pakhatah Rs 17 zel a la a ni.

Pathianni tlaia 'hanging bridge' cable a chah lai hian leiah hian mi 400-500 vel an awm nia sawi a ni a, an zingah hian naupang eng emaw zat an tel. Lei khaina cable a chah vang hian mi tam tak chu a hnuai tuipuiah an tla a ni. Lei hian ṭum khatah mi 125 vel chauh a dawl thei niin official-te chuan an sawi. Lei zawh tumte hnena ticket hralh a nih hian ṭum khata kal thei zat hi company leh thuneitu lam hian an ngaihven zui lo a, mipui thunun tumna pawh a awm lo nia sawi a ni bawk.

Lei chimna hmunah hian National Disaster Response Force (NDRF) team panga, State Disaster Response Force (SDRF) platoon paruk bakah Air Force, Army leh Indian Navy team-te chu chhanchhuah hna thawk turin tirh an ni.

Chief minister Bhupendra Patel pawhin Morbi khua hi pan nghalin, chhanchhuah hna thawk dante a enpui a ni. Chief Minister chuan vanduaina thlenga thi chhungte chu zangnadawmna, Rs nuai 4 ṭheuh leh, hliam tuarte chu Rs 50,000 ṭheuh pek an nih tur thu a puang. Morbi khuaah hian chhanchhuah hna thawh zawh fel a nih hma chu awmzui a tum bawk. State sorkar chuan lei chim chhan chhui chiang tur hian member panga awmna panel a din tawh bawk.

State home minister Harsah Sanghavi chuan lei chim chungchangah hian criminal case ziahluh a ni tih sawiin, he chhiatna thlenga mawhphurtute chu hremna na tak pek an ni ngei daw na ni, a ti.

Gujarat-a cham mek, prime minister Narendra Modi pawhin vanduaina a thlen hnu hian Chief Minister leh official dangte biain, thil awmdan a zawtfiah nghal a, chhanchhuah hna chu chak taka kalpui turin a hrilh.

Morbi lei hi European-style structure-in kum 125 liam ta khan Morbi Maharaja Waghji Thakor-a'n a siam a ni. Feet 765-a sei, feet 4.6-a zau leh lei aṭanga feet 60-a sangah dawh a ni. He lei hi Darbargadh Palace leh an hun laia lal chhungkaw chenna, Nazarbag Palace inkalpawhna tura a siam a ni.