Supreme Court-in CAA chungchanga petition lutte ngaihtuah ṭan ; CAA hian mimal dikna chanvo a nghawng tel lo : Sorkar laipui

Supreme Court chuan sawisel hlawh tak, Citizenship Amendment Act (CAA) chungchanga petition thehlutte chu nimin aṭang khan a ngaihtuah ṭan ta.

Court-in hearing a neih hma ni, Pathianni khan sorkar laipui chuan CAA chungchangah hian affidavit thehlutin, CAA chu dan ṭha tak, ram leh pawl thlan bikte tana ngaihnathiamna pekna tur niin, India khua leh tui tumah dikna chanvo a nghawng tel dawn lo tih Supreme Court a hrilh.

BJP kaihhruai sorkar laipuiin CAA a siam hi duh loin, Supreme Court-ah petition hi 220 vel zet thehluh a ni. Chief Justice of India UU Lalit kaihhruai bench chuan heng petition lutte hi nimin aṭang khan ngaihtuah ṭan a ni

He dan hnuaiah hian kum 2014, December 31 hma lama Afghanistan, Bangladesh leh Pakistan aṭanga sakhaw thlan bik - Hindu, Sikh, Buddisht, Jain, Parsi leh Kristian rawn pem lutte chu India khua leh tui nihna pek theih an ni dawn a ni. Muslim mite telh an ni ve lo leh, sakhaw thlan bik neih hian sawisel zui a hlawh hle.