Arvind Kejriwal-a'n Gujarat CM bang turin a phût
Aam Aadmi Party (AAP) hruaitu leh Delhi chief minister Arvind Kejriwal chuan Gujarat-a Morbi lei chim vanga mi tam tak thihna thleng chungchangah Gujarat-a BJP sorkar chu bei zui nghalin, chief minister Bhupendra Patel chu bang turin a phut. State Assembly inthlan pawh buatsaih nghal a ṭul niin a sawi bawk.
Kejriwal chuan Morbi lei chim chu eirukna kal zel vanga thleng nia sawiin, "Eng vangin nge sana siam ṭhin company hnenah lei cheiṭhatna tur tender hi pek a nih? BJP nen hian inzawmna an neih vang chauh a ni. He chhiatna thleng chungchanga FIR ziahluhah hian company emaw, a neitu emaw hming pawh ziahlan a ni lo," a ti.
Congress party senior leader, Madhya Pradesh chief minister hlui Digvijaya Singh pawhin Gujarat CM chu bang turin a phut ve bawk. Digvijaya Singh chuan Morbi-a chhiatna thleng chu 'sorkar siam chhiatna' nia sawiin, an state CM Bhupendra Patel chu mawhphurhna laa bang turin a phut tih a sawi. "Vanduaina rapthlak tak thleng hi politics nena kaihhnawih ka duh lo hle. Mahse lei a chim lai hian a bul hnai maiah BJP minister, MP, collector leh Morbi SP-te chuan meeting an nei a, chhiatna a thlen hnuah thil awmdan thlithlai turin an meeting pawh an titawp lo a ni," a ti.
Hetih lai hian Pathianni tlaia lei chim kaihhnawihah hian Gujarat police-te chuan mi pakua man tawhin an lakah thubuai an ziakluh tawh bawk. An mi man zinga mi pali chu lei cheiṭhat hna thawktu, Oreva firm-a thawk an ni. Midangte pawh he firm nena inkaihhnawihna nei vek an ni tih police-te chuan an sawi.
Supreme Court chuan lei chim chungchanga judicial inquiry neih phuta petition thehlutte chu November 14 -a ngaihtuah turin a dah bawk.
Gujarat-a cham mek, prime minister Narendra Modi chuan nimin khan chhiatna thlenna hmun Morbi a tlawh. Thawhṭanni khan PM hian Gandhingar-a Raj Bhavan-ah high-level meeting a kaihruai a, he meeting-ah hian lei chima thite sunna ni atan vawiin hi hman an rel.
Lei siamṭhat hna thawh turah tender tihchhuah a ni lo
Pathianni tlaia chim, Morbi lei hi British-ten India ram an awm laia siam niin kum 100 chuang zet a ni tawh a, private company chu chei ṭhat tir a ni. A cheiṭhat hna thawk tur hian Gujarat-a hmunpui nei, sana siamtu company Oreva chu thlan a ni a, thla sarih chhung an thawk a ni.
Morbi city municipal body chuan March thla khan Oreva hnenah contract hi a pe a, document-a a landanin contract thawk tur hian tender pawh tihchhuah a ni lo. Lei hi thla 12 tal khar a ngai nia sawi a nih laiin, Oreva hian thla sarih chhungin a siam a, lei khaitu cable hlui ṭhenkhat chu thlak loin an hmang chhunzawm a ni.
Overa hian thla sarih hnuah lei hi mipui tlawh theih turin an hawng leh nghal a, Municipal body hotu Sandeepsinh Zala chuan lei hawn chungchang hi Overa hian thuneitute pawh an hriattir lo a, fitness certificate pawh pek chhuah an ni lo tih a sawi.