Pakistan, Bangladesh, Afghanistan aṭanga lut minority-te Sorkar laipuiin India khua leh tui nihna a pe dawn

Sorkar laipui chuan Citizenship Act, 1955 hnuaiah Afghanistan, Bangladesh leh Pakistan aṭanga Hindu, Sikh, Buddhist, Jain, Parsi leh Kristian rawn pem lut, Gujarat-a district pahniha cheng mekte chu India khua leh tui nihna a pe dawn.

Union home ministry chuan Gujarat-a Anand leh Mehsana district-a chengte hi Citizenship Act, 1955-a section 5 leh section 6 hnuaiah India khua leh tui nihna hi pek an ni dawn tih a sawi.

Prime minister Narendra Modi kaihhruai sorkar chuan kum 2014, December 31 hma lama Bangladesh, Pakistan leh Afghanistan aṭanga Hindu, Sikh, Jain, Buddhist, Parsi leh Kristian pem lutte chu khua leh tui hihna pek a duh a, hemi atan hian Citizenship Amendment Act, 2019 (CAA) pawh a lo siam tawh a ni. Mahse he dan hi sakhaw tihbik nia sawi a nih avangin sawisel leh dodal a hlawh hle a, ramchhung hmun hrang hranga CAA duh lohna lantirnaa buaina chhuakah mi 100 chuangin nunna an lo chan tawh a ni.

CAA hnuaiah rules-te siamfel a la ni lo a, hei vangin he dan hnuaiah khua leh tui nihna hi pek theih a la ni lo. Hei vang hian Gujarat district pahniha chengte pawh hi Citizenship Act, 1955 hnuaiah zawk India khua leh tui nihna hi pek an ni dawn a ni.