2G spectrum case ngaihtuah hun sawn

Delhi Court chuan telecom minister hlui A Raja, DMK Rajya Sabha member Kanimozhi leh midangte laka 2G spectrum thubuai siamsak ngaihtuah hun chu December 5-ah a sawn.

Central Bureau of Investigation (CBI) Special Judge OP Saini chuan he thubuai ngaihtuah mekah hian document file enfiah turte chu a tam tham a, hei vang hian thutawp siam mai theih a la ni lo niin a sawi. Thutlukna siam tur chuan kar hnih kar thum vel la buaipui a ngai dawn a ni, a ti.

CBI court hian 2G spectrum licence pek dan dik lo nia sawi chungchangah thubuai pahnih a ngaihtuah a, pakhat chu CBI in a chhui mek a, pakhat dang chu Enforcement Directorate (ED) in a chhui thung.

CBI chuan telecom firm hnena 2G mobile air wave leh operating licence pek chungchangah hetihlaia telecom minister Raja chu dik lo taka thiltiah a puh a, hei vang hian sorkar pawhin sum tam tak a hloh phah niin a sawi. CBI chua 2G spectrum licence 122 pekchhuahnaah sorkar chuan cheng vaibelchhe 30,084 a hloh niin a tarlang.

ED pawhin a hrana thubuai ziaklutin, 2G licence pek danah Raja, Kanimozhi, DMK hotu M Karunanidhi-a nupui Dayaly Ammal leh midang ṭhenkhat chu dik lo taka cheah a puh bawk.