Delhi Half Marathon neih tum ṭhulh turin ngen

Indian Medical Association(IMA) chuan Delhi Chief Minister Arvind Kejriwal-a hnenah lehkha thawnin, November 19-a Airtel Delhi Half Marathon neih tum chu khawpui chhung boruak a bawlhhlawh nasat zel avangin ṭhulh turin an ngen.

Delhi Half Marathon title sponsor Airtel chuan khawpui chhung boruak bawlhhlawh zel tihziaawmna tura hma lak a nih thuai loh chuan kum tak tak Delhi Half Marathon buatsaihna tura a lo thawhpui tawhna chu tihtawpah a lo vau tawh bawk a ni.

Airtel chuan thuchhuah siamin, Delhi khawpuia air pollution level sang zel chu mihring hriselna atan pawh a hlauhthawnawm tawh a, thuneitute chuan he thil hi an ngaihven a, hma an lak thuai a ngai a ni, a ti.

Thawhlehni khan Punjab leh Haryana lam aṭanga thli a tleh vangin Delhi leh National Capital Region-a air quality chu nidang aiin a ṭha lo zawk a ni. NASA fire mapper satellite image aṭanga a lan danin, Punjab leh Haryana-ah thil hal khu a nasa hle a ni.

Nimina East Delhi Dilshad Garden-a Air Quality Index (AQI) chu 420 a ni a, Anand Vihar-ah 319 a ni. Pubjabi Bagh-ah pollution hi nasa berin AQI 999 a tling a, RK Puram-ah 852 a ni bawk. Dwarka leh NCR-a air quality chu 400–420 inkar a ni.

AQI level 101-200 hi ṭha thawkhat, 201-300 chu ṭha lo, 301–400 chu ṭha lo tak leh 401 chunglam chu hlauhthawnawm chin nia ngaih a ni.

IMA chuan pollution level sang zel chu mihring hriselna atana a hlauhthawnawm nia sawiin, Delhi sorkar hnenah naupangte hriselna venhimna turin school-te chu outdoor sport leh pawn lama activities dang neihte pawh tihtawp tir turin a ngen. IMA National President Dr KK Aggarwal leh Secretary General Dr RN Tandon chuan Deputy Chief Minister Manish Sisodia chu lehkha thawnin, AQI level hi 200 a pelh avangin pawn lama hun hman chungchanga khuahkhirhna siam a ngai tawh niin an sawi.