Gujarat-a lawyer association-ten Overa company-a thawkte dinsak tum lo

Gujarat-a Morbi lei chima mawhphurtu zinga puha man, lei cheiṭhat hna thawktu Oreva company-a thawk mi pakuate chu court-ah an dinsak dawn lo tih Gujarat-a bar association pahnih chuan an sawi.

Morbi Bar Association leh Rajkot Bar Association chuan resolution hi pass-in, Oreva mi leh sate chungthu ngaihtuahnaah, an pawl member lawyer-te chuan court-ah an dinsak dawn lo tih an sawi a ni.

Mori lei chim hnu hian a siamṭhat hna thawktu Oreva company chu an hnathawh danah sawisel a hlawh zui hle. Lei chim chhan pakhat hi a dawl tawk tura ruahman aia tam an awm vang nia sawi a nih rualin, company ten lei cheiṭhat hna an thawh hi an thawk ṭha tawk lo hle tih tarlan a ni bawk.

Nimin khan court-ah lei chhuat hi siamṭhat ni mah se, cable erawh siamṭhat a ni lo tih prosecutor-te chuan an sawi a, a chhuat siamṭhat hnu hian a hma aiin a rit sawt bawk a ni, tia hrilh a ni. Hetih laia a khaitu cable-te siamṭhat a nih tel loh avangin a him lo zual nia sawi a ni.

Morbi lei siamṭhat hna thawktu, contractor chu he hna thawk tur hian a qualify lo niin nimin khan prosecution chuan court a hrilh. Sana leh e-bike siam ṭhin company hi lei siam ṭhat hna thawk tur hian Morbi Municipality chuan an thlang a ni. Kum 2007 khan lei siamṭhat hna hi thawk turin thlan a lo ni tawh bawk.

Overa Group managing director Jaysukh Patel chuan October 26 khan mipui tlawh theih turin lei hi a hawng a, hawn a nih aṭanga ni li hnuah lei hi chimin mi 100 chuangin an thihphah ta a ni. He chhiatna thleng kaihhnawihah hian mi pakua man an ni tawh a, an zingah hian Overa group manager pahnih, lei siamṭhat hna thawktu sub-contractor pahnih bakah security guard leh ticket booking clerk-te an tel.

Supreme Court chuan lei chim chungchang hi Supreme court judge hlui chhuitir tura phutna thehluh chu November 14 hian a ngaihtuah dawn. PIL thehluttu, advocate Vishal Tiwari chuan he vanduaina thleng hi sorkar thuneitute lam inthlahdah vang niin a puh. Thuneitu leh mawhphurtute lam inthlahdah leh enkawl ṭhat loh avangin ram chhungah chetsualna a thleng fo a ni, a ti.