EVM-ah candidate-te thlalak leh chanchin tarlan phut

Electronic Voting Machine (EVM)-a candidate thlalak leh an mimal chanchin tarlan phutin Supreme Court-ah petition thehluh niin nimin khan court chuan a ngaihtuah.

Chief justice of India UU Lalit leh justice Bela M Trivedi awmna bench chuan, advocate Ashwini Upadhyay petition thehluh hi an ngaihtuah. Mahse poll body-in a kaihhnawih thuneitu lamin an ngaihtuah dawn nia a sawi vangin bench hian a buaipui zui dawn ta lo a ni.

Petition thehluttu hian, EVM-a candidate thlalak leh chanchin tarlan a ngaih chuan, political party-te chuan a party candidate pawh an thlan uluk phah a, mi rintlak leh thil dik lo tihnaa inhmahnawihte candidate-a ruat pawh a tlem phah dawn niin a sawi.

Attorney General R Venkataramani chuan petition thehluttu ṭan chhante chu thil awm tak a nih rualin, pawmpui vek erawh a har tih a sawi. EVM-a vote thlak hun chu inthlan campaign zawh hnu vekah chauh a ni a, mipuite pawhin an vote tur chungchangah duhthlanna an lo siam hman vek tawh a ni, a ti. Hei vang hian EVM-a thlalak tar chuan awmzia a nei thui dawn nia sawi chu a dik chiah loh a rin thu sawiin, political party tinten nihna an nei vek a, an symbol chu an nihna hriat theihna awlsam ber a ni, a ti.