ECI-in Gujarat assembly inthlan neih hun tur puang

Election Commission of India (ECI) chuan nimin khan Gujarat assembly inthlan neih hun atan December 1 leh 5 ruat a nih thu a puang. Inthlan result hi Himachal Pradesh nen puang rualin, December 8-ah puan a ni ang.

Chief election commissioner Rajiv Kumar chuan nimin khan inthlan neih hun tur hi puangin, vawiin hian inthlan tur chungchangah hriattirna tihchhuah nghal a ni dawn tih a sawi. Inthlana chuh tumte tan November 14 thleng nomination paper thehluh theih a ni ang a, inhnukdawk duh tan November 17 thleng hun hawn a ni.

Seat 182 awmna, Gujarat Assembly-a seat 89-ah December 1-ah inthlan thawh khatna hi neih a ni ang a, a thawh hnihna hi December 5-ah seat 93-ah neih a ni ang.

Gujarat-ah hian kum 25 chhung chu BJP in thuneihna changin, tunah pawh BJP sorkar a ding mek a ni. Assembly inthlan hnuhnung ber, kum 2017-a neihah khan Congress party rawn che ṭha chhoin, BJP hian tun hma lama an dinhmun a pha lo a, mahse sorkarna erawh an la siam thei a ni. Tun hnaia Morbi lei chima mi 140 chuang thihna thleng chu tun ṭum inthlanah eptu party-ten BJP beihna remchangah an hman chhoh ngei rin a ni bawk. Aam Aadmi Party (AAP) lam pawhin Gujarat-ah hian ṭan an raw la mek a, hei vang hian tun ṭum inthlanah hian BJP, Congress leh AAP-te chu inbei na hle tura ngaih an ni.

Assembly inthlan lo awm turah hian vote nei mi vaibelchhe 4.9 chuang an awm. Kum 2017 inthlanah khan vote nei hi mi vaibelchhe 4.35 an awm a ni. Kum 80 chunglamte chu in aṭanga vote thlak tir dan ngaihtuahsak an ni ang.

Vote thlakna tur, polling station 51,000 chuang siam a ni dawn a, heng zinga 34,000 chu rural area-a mi an ni. Polling station 1,274 chu hmeichhe official hlangin an enkawl dawn.

Election Commission hian Himachal Pradesh assembly inthlan neih hun atan November 12 ruat a nih thu a lo puang tawh bawk. State pahnih inthlana vote tlate hi December 8-ah chhiar an ni dawn a, result pawh puan a ni nghal dawn a ni.