Delhi khawpui boruak bawlhhlawh zual zel Nu leh paten school khar an duh

Delhi khawpui boruak a bawlhhlawh zual zel a, nimin khan khawpui chhunga air quality index (AQI) chuan mihring tana hlauhthawnawm 'severe' category an thleng a, nu leh pate chuan school khar turin thuneitute an ngen.

Central Pollution Control Board-in data a tihchhuahah, khawpui chhung hmun tam zawkah AQI hian 450 a pel a ni. AQI 400 chin hian mihring hrisel pangngai pawh a nghawng tawh a, natna neisate tan phei chuan harsatna nasa tak a thlen thei a ni.

Thlasik apiangin Delhi boruak hi a chhe zual a, in sakna bawlhhlawh khu, motor khu leh a ṭhenawm state thlai ro hal khute nen mihring tana harsatna thlen khawpin AQI hi a awm ṭhin a ni. Khaw vawt leh thli tlehten air quality hi a tichhe zual bawk ṭhin.

Nu leh pa leh environmentalist-te chuan social media lamah khawpui boruak bawlhhlawh zual zel avang hian school khar turin an ngen. Enviromental activist Vimlendhu Jha chuan AQI 500 velah naupangte tana boruak hip chu thil nihdan tur a ni lo, a ti. National Commission for Protection of Child Rights (NCPCR) pawhin Delhi sorkar hnenah khawpui boruak a ziaawm hma chu zirna inte khar turin a nawr bawk.

Chief minister Arvind Kejriwal kaihhruai AAP sorkar chuan khawpui boruak bawlhhlawh venna tur kawng khat atan tun kar aṭangin in sak leh in ṭhiah hna thawh a khap a, mipuite pawh an kalchhuahnaah motor inhmanṭawmte leh, motorcyle hmang uar turin a chah a, in lamah thing leh lungalhthei an hmante titlem turin a ti a ni.