Delhi air quality chhiat belh zel Pathianni thleng school khar dawn

Delhi thunetiute chuan khawpui air quality chhe zel venna kawng khat atan khawpui chhunga motor parking fee chu a let liin an ti sang.

Supreme Court-in a ruat, Environ-ment Pollution Prevention and Control Authority (EPCA) chuan khawpui chhung boruak a bawlhhlawh belh zel avangin mipuite chu private motor hmang tam lo tura an ngenna pakhat atan he ruahmanna hi a siam a ni.

National Green Tribunal (NGT) chuan Delhi khawpui boruak chu a ṭha tawh lo hle tih sawiin, Uttar Pradesh, Punjab, Haryana leh Delhi sorkar hnenah pawh air pollution veng leh tiziaawm tura hma a lak dante hriattir turin a hrilh a ni.

Delhi sorkar chuan nimin khan khawpui chhunga school zawng zawng khar turin a ti a, air pollution a nasat em avangin Pathianni thleng khar an ni ang. Education Minister Manish Sisodia chuan air pollution level sang zel vangin school-te chuan outdoor activity engmah buatsaih lo turin a hrilh bawk. Nimin khan Delhi khawpuiah hian Air Quality Index (AQI) chu 484 a tling tawh a ni. Chief Minister Arvind Kejriwal-a chuan kumtinin tun ang hunah hian an ṭhenawm state-a ram hal nasat avangin meikhu leh boruak chhia a zual ziah niin a sawi a, Delhi chu gas chamber ang mai a nih thu sawiin, an harsatna tawh chinfel dan tur hi an ngaihtuah a ngai tih a sawi.