Haryana : Ryan school naupang thattua puh man

Haryana-a thla khat chuang liamtaa Ryan International School, Gurugam-a Class 2 zirlai, kum sarih mi thattua puh, he school-a senior student, Class 11 zirlai chu man a nih thu he thubuai chhuitu, Central Bureau of Investigation chuan a sawi.

September 8 khan school washroom-ah Class 2 zirlai, mipa naupang hi rawng taka thah a ni a, he tualthahnaa inhnamhnawiha puhin police-te chuan school bus conductor an man tawh a, school management-a senior official pahnih pawh man an ni bawk.

School building chhunga inthahna thleng vang hian zirlai nu leh pate an thinur hle a, lungawi lohna an lantir hnuah tualthah thubuai hi Chief Minister Manohar Lal Khattar chuan CBI chhuitir turin alo ngen tawh a ni.

CBI chuan Thawhleh-ni zan khan zirlai naupang thattua puh, senior student hi man a ni a, nimin khan Juvenile Justice Board hmaah hruai a nih thu a sawi. Mahse zirlai an man pa hian a fapa an puhna hi thu dik lo niin a sawi thung. He zirlai hian examination leh parents-teacher meeting neih tur chu sawnhla se a duh avangin he pawikhawihna hi a thlen niin CBI chuan a sawi. A hmanraw hman pawh hmuh ni tawhin chhui chian mek a ni.