PM-in CM-te meeting neihpui dawn Ram pumah hri kai 62,939 an awm tawh
Prime minister Narendra Modi chuan vawiin tlai dar 3-ah hian Chief Minister-te video conference hmangin meeting a neihpui leh dawn a, hripui leng vanga ram chhung hmun hrang hrang dinhmun leh hmalak zel dan turte a sawipui ang.
Vawiina Prime Minister leh Chief Minister-te meeting neih tur hi hripui chungchanga meeting vawi nga an neihna tur a ni.
Covid-19 leng vangin ram pumah kharkhipna kalpui a ni reng chungin nitin hri kai thar an pun belh zel a, union health ministry-in a tarlan danin nimin thleng khan hri kai hi 62,939 awm tawhin, an zinga 2,109 in an thihpui tawh a ni.
Inrinni khan hri kai thar hi mi 3,277 an awm a, hemi hun chhung vek hian hri vanga thi hi mi 128 an awm bawk. Hri kai thar zinga 50% hi khawpui panga - Delhi, Mumbai, Pune, Ahmedabad leh Chennai-a mi an ni.
Maharashtra chu hri leng tuar nasa ber ni zelin, Inrinni khan hri kai zinga 48 an thi a, ni khata thi an tam ber ni a ni. An state-a hri kai awm zat hi 20,000 an chuang tawh a, mi 779 in an thihpui tawh bawk.
Health ministry chuan central team chu hri leng hluarna state 10-ah state health department-te pui turin tirh an ni dawn tih a sawi.
Central health team hi Gujarat, Tamil Nadu, Uttar Pradesh, Delhi, Rajasthan, Madhya Pradesh, Punjab, West Bengal, Andhra Pradesh leh Telangana-ah an kal dawn a ni.