UAE pui turin nurse 88 kal

United Arab Emirates (UAE)-in hripui leng a dona kawnga pui turin, kar liam ta Inrinni khan India nurse 88-te chuan Dubai an thleng. 

UAE-ah hian Covid-19 kai hi nimin thleng khan mi 17,417 an awm tawh a, heng zinga mi 4,295 te chu enkawl dam tawh niin, hri vanga thi hi mi 185 an awm tawh bawk a ni. Kar liam ta Inrinni khan UAE-ah hian hri kai thar mi 624 an awm a, thi hi mi 11 an awm tih Ministry of Health and Prevention chuan a tarlang.

India aṭanga nurse 88 kalte hi Kerala, Karnataka leh Maharashtra state aṭangtein an ni a, India-a an lo let leh hunah ni 14 quarantine an ni ang. UAE-a India  ambassador Pavan Kapoor chuan he hmalakna hi ram pahnihte inkungkaihna ṭhatzia tilangtu a ni, a ti.

India Consul General Vipul chuan India leh UAE hi hman aṭanga inṭhianṭha ram an nih thu sawiin, hun harsa tak karah ram pahnihte an inpui tawn thei chu a lawmawm a tih thu a sawi. UAE-a Aster DM Healthcare Founder Chairman and Managing Director Azad Moopen chuan India aṭanga an ram mipuite pui tura lo kal te chungah lawmthu a sawi a, heng nurse kalte hi a bik takin intensive care unit (ICU) a specialist-te an nih thu a sawi bawk.