Delhi air pollution : Vawiin aṭangin primary school khar dawn

Delhi khawpui boruak bawlhhlawh belh zel avangin vawiiin aṭangin primary school zawng zawng chu khar a ni dawn tih chief minister Arvind Kejriwal chuan a sawi.

Chief Minister chuan secondary leh higher secondary school zirlaite erawh chu school kal chhunzawm tir an ni ang a, mahse outdoor activity engmah an tih phalsak a ni lo, a ti. Boruak bawlhhlawh belh zel venna kawng khat atan motor number kawpkim leh kawpkim lo intlanchhuawk, odd even scheme hman dan ngaihtuah a ni dawn tih a sawi bawk.

Nimin khan Aam Aadmi Party (AAP) hruaitu pahnih, Delhi CM Arvind Kejriwal leh Punjab CM Bhagwant Mann-te chuan press conference neiin, thlai ro hal nasat avanga tun hnaia air quality a chhiat zual chungchangah mawhphurhna an la tih an sawi.

Kejriwal chuan, air pollution chu Delhi chauh ni lo, North India pumpui buaina a ni tih sawiin, sorkar laipui chuan a sutkian dan ngaihtuah tura hma la turin a ngen. "AAP emaw, Delhi sorkar leh Punjab sorkar emaw mawhpuh kual tur a ni lo. Tun hi inpuhkual hun a ni lo a, hetiang thil hi politics thila lakluh tur a ni lo. Punjab-ah thlai ro an hal nasa tih ka pawm thlap a ni," a ti.

Nimina Delhi AQI chu a ni hnihna atan 'severe' category-ah a la awm a, khawpui pum AQI hi 472 a la tling a ni. National capital region-a awm, Nodia-ah chuan AQI hi 562 niin, Gurugram-ah 539 a la ni tih SAFAR (System of Air Quality and Weather Forecasting And Research) India data chuan a tarlang.

Boruak bawlhhlawh belh zel avangin Nodia leh Greater Noida bialah pawh Class 8 hnuai lam chu November 8 thleng online class-a kalpui tura tih an ni. Class 9 - 12 te pawh a theih anga tam online class-a kalpui turin an ti bawk.

SC-in Nov 10-ah petition ngaihtuah dawn
Supreme Court chuan Delhi leh national capital region (NCR)-a thlai ro halin boruak a tibawlhhlawh tur venna atan kaihhruaina thar siam phuta petition thehluh chu November 10-ah ngaihtuah a remti.

Petition hi lawyer Shashank Shekhar Jha thehluh a ni a, Delhi chheh vela thlai ro hal chuan khawpui boruak bawlhhlawh tak chu a tichhe zual niin a sawi a, 'Hetiang dinhmunah chuan mi pangngai tan pawh kal ṭhat thei a ni lo," tiin Air Quality Index (AQI) level a san zel thu a sawi.

Chief justice of India Uday Umesh Lalit leh justice Bela M Trivedi awmna bench chuan lawyer Jha petition thehluh hi November 10-a ngaihtuah tura dah a ni tih a sawi.