Covid-19 hri kai thar 1,216 an awm

India rama Covid-19 hri leng dinhmun a ziaawm tawh hle a, union health ministry-in data a tihchhuahah, Ningani khan ram pumah hri kai hmuh chhuah thar mi 1,216 an awm.

Ningani thleng khan hri kai hmuh chhuah tawh hi 4,46,58,365 niin, heng zingah hian hri kai mek, active case chu 15,705-ah a tla thla tawh. Hri kai mek hi hri kai hmuh chhuah tawh aṭanga 0.04% chauh an ni tawh.

Hri vanga thi mi 18 awm belhin, ram pumah hripui vanga thi hi mi 5,30,479 an awm tawh. Hei hi hri kai tawh aṭanga 1.19% an ni.

Covid vaccine pawh pek chhuah chhunzawm zel a ni a, hetih lai hian vaccine la erawh an tlahniam ṭan tawh. Ministry website-a a landanin, nimin zing dar 8 thleng khan ram pumah vaccine hi dose vaibelchhe 219.69 pek chhuah a ni tawh.