Gujarat : Morbi Civic hotu suspend a ni

Gujarat sorkar chuan Pathianni tlaia Morbi lei chima mi tam tak thihna thleng vangin, Morbi Municipality chief officer Sandipsinh Zala chu Ningani khan a suspend.

Morbi District Collector GT Pandya chuan Sandipsinh Zala suspend a nih thu hi sawiin, Resident Additional Collector chu chief officer charge lak tir a ni nghal tih a sawi.

Morbi Municipality hi Overa group hnena lei siamṭhat hna thawk tura contract petu a ni.

Lei chim kaihhnawihah hian police-te chuan mi pakua an man tawh.

Gujarat sorkar chuan lei chim vanga chhanchhuah hna a thawh chu ni nga hnu, Ningani khan a titawp. Chhiatna a thlen hnu hian Morbi lei hnuaia Machchhu luia tlate zawn leh chhanchhuah hna hi Indian Army, Navy, National Disaster Response Force (NDRF), State Disaster Response Force (SDRF), local fire department leh police department-ten an thawk nghal a ni.

Rajkot Range inspector general, Ashok Kumar Yadav chu chin hriat loha awm an awm tawh lo nia sawiin, lei chim vanga thi pawh 135 an ni tih a sawi. Chhanchhuah hna thawh tihtawp ni mah se, venthawn thilah local fire brigade, SDRF leh NDRF team khat ṭheuh chu chhiatna thlenna hian dah chhunzawm an la ni ang.