Himachal Pradesh : BJP-in Uniform Civil Code hman a tiam ; Congress-in Old Pension Scheme hman leh tum
State assembly inthlan neihna tur, Himachal Pradesh-ah party hrang hrangte an campaign ngawrh hle. Rorellai BJP chuan sorkarna an chang leh a nih chuan Himachal Pradesh-ah Uniform Civil Code hman a tiam.
BJP manifesto hi nimin khan BJP national president JP Nadda chuan a tlangzarh a ni.
BJP hian Uniform Civil Code hi inthlan neihna tur state dang, Gujarat-ah pawh hman a tiam bawk a ni. Hei hi eptu party hrang hrangte chuan na taka sawiselin, civil code chu state ni loin,central-in a buaipui zawk tur a ni tiin, BJP thiltih chu Hindu sakhaw zuitute vote hip tumnaah an puh.
BJP chuan Himachal Pradesh-ah hian Islamic estate, Waqf property-ah thil dik tawk lo a awm leh awm loh zirchian an tiam bawk. Hei bakah hian kum nga chhunga hna nuai 8 siam te, state tharchhuah pui, apple-ah GST lak chu 18% aṭanga 12%-a tihhniam te, sorkar hna laknaah hmeichhiate tan 33% reservation siamte an tiam bawk.
Assembly seat 68 awmna, Himachal Pradesh assembly inthlan hi November 12-ah neih a ni dawn a, December 8-ah vote tla chhiarin result puan a ni ang.
Congress-in pension scheme hlui hman leh tiam
Congress party chuan Inrinni khan manifesto an tlangzarh tawh bawk a, sorkarna an chan chuan Old Pension Scheme chu hman leh tiamin, constituency tin tan startup fund cheng vaibelchhe 10 ṭheuh pek bakah, electricity unit 300 chin a thlawna pek an tiam.
Congress poll manifesto commitee chairman Dhani Ram Shandil chuan manifesto hi tlangzarh in, state-a rorellai BJP sorkar chuan miputie beisei a pha lo a, a thu lo tiam hrang hrangte a tihlawhtling thei lo a ni, a ti.
Shandil chuan education leh employment lam chu an dah pawimawh tih sawiin, hemi chungchang buaipui tur bik 'Youth Commission' pawh din a ni dawn tih a sawi. High Court judge ṭanglai kaihhruaiin ‘Anti Drug Abuse Enforcement Authority’ din a ni ang a, hna thawktu lakna turah advertisement tihchhuah aṭanga thla ruk chhungin lak fel zel a ni ang, tiin a sawi. BJP sorkar hnuaiah sorkar hna laknaah thil fel tawk lo a tam hle tih a sawi.