Covaxin dose mtd 50 nakkum kumtirah expire dawn

Ram chhungah Covid-19 vaccine la an tlem zel avang leh, demand a tlakhniam zel avangin Bharat Biotech-in Covaxin a siam, an kawl mek zinga dose maktaduai 50 vel chu nakkum kumtirah a thi, expire hman tawh dawn tih company chuan a sawi.

Vaccine demand a tlakhniam avangin Bharat Biotech hian kumin kumtir lam aṭang khan Covaxin siamchhuah thar hi a titawp a ni. Kum 2021 kumtawp thleng khan vaccine hi dose vaibelchhe khat an siam a ni. An vaccine siam tam tak hi demand a awm loh chuan nakkum kumtir lamah an thi tawh dawn a, company hian sum tam tak a hloh dawn nia sawi a ni a, a sum hloh tur zat erawh sawilan a ni lo thung.

Ram chhunga vaccine demand a tlakhniam bakah, UN agency kaltlanga ram pawn lama Covaxin thawnchhuah tihtawp a nih chhoh avangin vaccine hralhchhuah hi a tlahniam hle a ni.

India ramah Covid-19 hri leng a ziaawm chho zel a, Inrinni liam ta khan ram pumah hri kai hmuh chhuah thar mi 1,082 awmin, active case pawh 15,200-ah a tla thla tawh tih union health ministry chuan a sawi.

Vaccine hi dose vaibelchhe 219.71 semchhuah a ni tawh a, ram pumah hri leng a ziaawm zel avangin vaccine la hi an tlem chho hle tawh a ni.