Delhi Air Quality : Chhungkaw 5 zinga 4 zelin boruak bawlhhlawh vanga harsatna tawk

Delhi khawpui boruak bawlhhlawh chuan khawpuia chengte harsatna a thlen belh zel a, zirchianna neihah kar rei vak lo liam ta aṭang khan Delhi-National Capital Region-a cheng chhungkaw panga zinga pali-te chuan an chhungkuaah harsatna tawk an awm tih an sawi.

Boruak bawlhhlawh avanga harsatna an tawh hrang hrang zingah hrawk na, khuh, thawk lama harsatna leh mit na te a tel. Mi 19,000-te thu an zawhnaah, an zinga 18% chuan harsatna an tawh vang hian doctor an rawn tawh tih an sawi bawk.

Survey hi Delhi, Noida, Ghaziabad, Gurugram leh Faridabad-ahte neih a ni.

Inrinni khan a zawna ni thumna atan Delhi air quality index (AQI) chu 'severe' category-ah la awmin 431 a la ni. PM 2.5 chu 460 micrograms per cubic metre la niin, hei hi mihring tana him tawk nia sawi, 60 micrograms per cubic metre let riat zeta sang a la ni bawk.

Khawpui boruak bawlhhlawh avang hian Delhi sorkar chuan khawpui chhunga primary school zawng zawng chu khar a ni dawn tih a lo puang tawh a, Class 5-7 naupangte pawh outdoor acitivity an neih a khap bawk. Sorkar hnathawk zinga 50% chuan in lam aṭangin an thawk dawn bawk a ni.