Odd-even scheme vangin motor nuai 13 ding dawn

Delhi sorkarin khawpui chhung boruak bawlhhlawh zual zel tur venna kawng khat atana November 13-17 chhunga Odd-even scheme a hman turah, ni khatah motor nuai 13 an din phah dawn a ni.

Karleh Thawhṭanni aṭang hian motor number kawpkim leh kawpkim lote tlanchhawk tir an ni dawn a, ni nga chhung he scheme hi hman a ni ang. He scheme hman a nih hunah ni khatah private car nuai 13 dawn chu an tlanchhuak thei dawn lo a ni. Motor tam tak an tlanchhuah theih dawn loh avangin mipuite'n veivahna kawngah harsatna an tawh rin a ni a, hei vang hian mipuite harsatna phuhrukna atan sorkar chuan bus 500 hire a tum.

Odd-even scheme hi zing dar 8 aṭanga zan dar 8 thleng hman a ni ang a, two wheeler erawh a huam tel lo ang.

Delhi khawpui chhungah hian motor register vaibelchhe khat chuang a awm a, heng zinga 31,72,842 chu car an ni.

Khawpui chhung boruak bawlhhlawh zual zel avangin thuneitute chuan mipuite chu pawn chhuak tam lo turin an ngen a, state sorkar pawhin Pathianni thleng school a khar bawk. School-te chu outdoor activity buatsaih lo tura hrilh an ni. Boruak awmdan azirin school khar chhunzawm a nih dawn leh dawn lo pawh ngaihtuah leh tur a ni.