Punjab CM-in CM meeting ko turin PM a ngen

Punjab leh Haryana-a thlai ro hal khu avanga ramchhung hmarlam bialte chuan air pollution nasa vangin harsatna an tawk mek a, hei vang hian Punjab Chief Minister Amarinder Singh chuan Prime Minister Narendra Modi-a hnenah harsatna tawk state chief minister-te chu meeting neihpui turin a ngen.

Punjab CM chuan thlai rote boruak tihbawlhlawh lo zawnga tihral an nih theihna turin loneitute tan ruahmanna leh zangnadawmna siamsak turin a ngen a bawk. Amarinder chuan scientific method hmanga thlai ro tihral chu a senso a hautak avangin loneitute chuan a awlsam leh senso tlawm zawk, hal ral mai chu an thlang zawk ṭhin a ni, a ti.

Amarinder Singh chuan ramchhung hmarlam biala hmun tam zawk,Natioal Capital Region thlengin air pollution nasa tak avangin harsatna an tawk mek a, an harsatna tawh mek hi ramchhunga court sang zawk leh National Green Tribunal-te pawhin an buaipui a ni, a ti. NGT hian boruak a bawlhhlawh zual zel vangin Delhi-ah chuan in sak hna thawh leh bawlhhlawh hal a lo khap tawh a ni.

Delhi Chief Minister Arvind Kejriwal-a pawhin meikhu-in Delhi leh a chhehvel a bawh nasa lutuk tihziawm dan kawng zawng turin Punjab leh Haryana chief minister-te meeting neihpui a duh thu alo sawi tawh bawk.