VHP-in Ram temple siam dan ruahman dawn

Vishwa Hindu Parishad (VHP) chuan kum 2018-ah Ram Temple ropui tak sakna tur ruahmanna chu an tifel thuai dawn niin a sawi.

VHP thupuangtu Surendra Jain chuan Uttar Pradesh-a Ayodhya-ah Ram Temple sak a nih ngei theihna turin a theih ang anga hmalak a nih thu a sawi. Hemi chungchang hi tun thla chhungin an pawl hruaitu liante sawipui vek an tum thu a tarlang bawk.

November 27 aṭang hian Odisha state khawpui, Bhubaneswar-ah VHP Central Managing Committee, ni thum awh tur chu neih ṭan a ni dawn a, he hunah hian Ram Temple sak tur chungchang hi sawihoin, hmalak dan turte an siam nghal dawn niin Jain chuan a sawi. Ram Temple sak tur hi tihkhawtlai a ni dawn lo a, 2018-ah sak ṭan hman ngei turin theihtawp an chhuah tur thu a sawi.

Meeting-ah hian state hrang hrang aṭanga VHP aiawhte an tel dawn a, ram dang 50 aṭangin palai an tel bawk ang.

VHP hruaitu chuan Kristian missionary-te chu Hindu-te phiarruah a puh bawk a, state sorkar hnenah Hindu puithiam Laxamananand Saraswati thah a nih chungchang chhuitu, Naidu Commission report chu mipui hriata puangzar turin a phut. He report aṭang hian mipuite chuan thil tisualtu dik tak chu an hre mai dawn a ni, a ti.

Sakhaw inleh khapna dan a awm chungin, Odisha sorkar chuan Hindu-te sakhaw danga an inlet tur venna kawngah a hlawhchham niin a sawi. State sorkarin Abhimanyu Samant Sinhar road hming Mother Teresa road tia a thlak chu a sawisel bawk.