Kum 5 chhungin Armed Police Forces-ah mi nuai 2 dawn lak an ni

Kum nga chhungin central armed police forces-ah ṭhalai nuai hnih dawn lak thar an ni tih union home ministry data chuan a tarlang.

Hetih lai hian kumin July thla thleng khan Border Security Force (BSF), the Central Reserve Police Force (CRPF), Central Industrial Security Force (CISF), Indo Tibetan Border Police (ITBP), Sashastra Seema Bal (SSB) leh Assam Rifles (AR)-ah hna ruak hnawh khah loh 84,000 vel a la awm. Official-te chuan heng hna ruakte hi a rang thei anga hnawhkhat turin hma lak mek a nih thu an sawi.

Home ministry data-a a lan danin, kum nga kalta chhung khan CRPF-ah mi 1,13,208 lak thar niin, SSB-ah mi 29,243 leh BSF-ah mi 17,482 lak thar an ni. CISF-ah 12,482, ITBP-ah 5,965 leh Assam Rifles-ah mi 5,938 lak thar an ni bawk.

October 22 khan prime minister Narendra Modi chuan thla 18 chhunga armed force-a thawktur nuai 10 lak belhna tur, recruitment drive tlangzarhin, mi 75,000 hnenah appointment letter sem a ni.

Home ministry official chuan sorkar laipui chuan Central Armed Police Forces-a hna ruakte chu nakkum December thlaah hnawhkhah vek hman tum a ni tih a sawi. CAPF hi nuai 10 vel an ni.

BSF hian India-Pakistan ramri, km 3,323-a thui leh, India-Bangladesh ramri km 4,096-a thui an veng.

CRPF hi internal security lama hna thawk tura dah niin, Jammu and Kashmir leh hmarchhak biala hel laka beihpui thlakna leh, dan leh thupek kenkawh hna thawk tura dah an ni ṭhin.

CISF hian installation pawimawh - nuclear plant, industry, metro network leh sorkar building pawimawhte an veng thung.

ITBP hi Sino-Indian border, km 3,488-a thui veng tura dah niin, SSB hian Nepal ramri km 1,751 leh Bhutan ramri km 699-a thui an veng a ni.

Assam Rifles hian Indo-Myanmar border, km 1,643-a thui vengin, hmarchhak biala hel laka beihpui thlak hna an thawk bawk ṭhin.