Bharat Jodo Yatra-in Maharashtra state thleng

Congress party-in Rahul Gandhi kaihhruaia Bharat Joda Yatra an neih mek chuan nimin khan Maharashtra state an lut.

Nimin kha yatra kal ṭan aṭanga a thla hnihna niin, state panga - Tamil Nadu, Kerala, Andhra Pradesh, Karnataka leh Telangana te an kaltlang tawh a ni. Nimin tlai khan Telangana-a Karmareddy district aṭangin Maharashtra-a Nanded district-a Madnur Naka an lut. Maharashtra Congress chuan yatra-a telte hi Madnur Naka-ah hian an lo hmuak a ni.

Bharat Yodo Yatra hi Maharashtra state-ah ni 14 chhung neiin, km 381-a thui an kal dawn a, assembly bial 15 leh parliamentary constituency paruk an kaltlang ang. Thawh hnihin an kal dawn a, zing dar 6-10 chhung leh, tlai dar 4:30-7:30-ah an kal dawn a, Rahul Gandhi hoin ni khatah km 22-23 an kal ṭhin ang.

Maharashtra Congress hruaitu leh worker eng emaw zat chuan an state-a yatra neih chhung hian an zawm ve dawn a ni. Congess chuan National Congress Party (NCP) president Sharad Pawar leh chief minister hlui Uddhav Thackery-te chu yatra hi zawm ve turin an sawm bawk. State chhunga an awm laiin Rahul Gandhi hian rally ṭum hnihah thu a sawi dawn a, November 10-ah Naded district leh November 18-ah Budhana district-ah rally hi neih a ni ang.

September 7-a Kanyakumari, Tamil Nadu aṭanga kal ṭan, Bharat Jodo Yatra hi Jammu and Kashmir-ah an tawp dawn a, ni 150 chhung kalin, km 3,570-a thui an kal dawn a ni.