SC-in EWS tana 10% reservation dah thlawp

Supreme Court chuan kum 2019 inthlanpui neih dawna sorkar laipuiin central sorkar hnuaia hna lak leh zirna ina mi rethei, economically weaker section (EWS) tana 10% quota a lo siam chu a thlawp.

EWS tana 10% dah tura 103rd Constitution Amendment siam chungchanga petition lut chu nimin khan chief justice of India UU Lalit kaihhruai judge panga awmna bench chuan a ngaihtuah a ni. Judge dangte chu Dinesh Maheshwari, S Ravindra Bhat, Bela M Trivedi leh JB Paridawal-te niin, he amendment siam hian ram danpui a kalh lo tiin, 3-2 in a thlawp lam an chak a ni.

Bench thutlukna siam chu chhiar chhuakin, justice Maheswari chuan 103rd Constitutional amendment chuan ram danpui a kalh lo a, hman theih a ni tih sawiin, reservation policy siam chu ennawn ṭulna a awm lo tih justice Trivedi chuan a sawi bawk.

Hetih lai hian justice Bhatt chuan judge tam zawk thutlukna siam hi a thlawp ve lo tih sawiin, EWS category hnuaia reservation siam hian SC/ST/OBC a huam tel loh avangin inthliarna nasa tak a ni, a ti thung.

Sorkar laipuiin 103rd Constitution Amendment a siam hi kum 2019 khan Parliament-ah pass a ni.