Gujarat High Court-in lei chim chungchangah state sorkar hriattirna pe
Gujarat High Court chuan Mobri lei chim chungchangah state sorkar leh local authority-te chu hriattirna pein, November 14 hmaa report kimchang thehlut turin a ti.
October 30-a Morbi lei chimah khan mi 135 in nunna an chan a ni.
Gujarat High Court chief justice Aravind Kumar leh justice Ashutosh Shastri awmna bench chuan Gujarat chief secretary, state home department, commissioner of municipalities, Morbi municipality, district collector leh State Human Rights Commission-te kaltlangin state sorkar hriattirna hi a pe. Chief secretary leh home secretary-te chu November 14-ah chhiatna thleng chungchanga sorkar hma lak tawh dan report pe turin a ti a, State Human Rights Commission pawh report pe turin a ti bawk.
Gujarat police-ten lei chim chungchang an chhuinaah, lei cheiṭhat hna thawktu Oreva Group chuan lei siamṭhatna tur sum ruahman, Rs vbc 2 aṭangin 6%, Rs nuai 12 chauh an hmang nia sawi a ni. An sum sen zat hi DevPrakash Solutions hnen aṭanga document an manah tarlan a ni. Structure ṭhenkhat thlak leh siamṭhat ngaite chu thlak loin rawng an hnawih thar ringawt nia sawi a ni bawk.
Ngaidam dil tumah an la awm lo : P Chidambaram
Congress party hruaitu hlun, P Chidambaram chuan Morbi lei chima chhiatna rapthlak tak thleng chungchangah, Gujarat-a rorellai BJP sorkar leh party hruaitute zingah tumah ngaihdam dilna tichhuak an la awm lo tih a sawi.
Chidambaram chuan, "Tun thlenga ka hriat danin, he chhiatna thleng chungchangah thuneitute zingah ngaihdam dil emaw, bang emaw an la awm lo. Hei hi BJP chapo leh induhzia lantirtu a ni. Ram danga thleng chu ni se, thuneitu zingah banna thehluh an awm ngei ang," a ti.
Gujarat-a BJP sorkar chu Delhi aṭangin an hotuten an thunun vek a, BJP hian inthlanah awlsam taka an chak leh mai an rin avangin he chhiatna thlengah pawh hian mawhphurhna an la duh lo a ni, a ti. Central agency, CBI leh ED-te pawh BJP tana thawk nia a ngaih thu sawiin, 'An mi man zinga 95% hi eptu party mi leh sa an ni," tiin Chidambram chuan sawi zui bawk.