Bawlhhlawh paih dana fimkhur loh vangin Bihar Healthcare Centre 1,800-te warning pe

Bihar State Polllution Control Board (BSPCB) chuan state chhunga healthcare centrae 1,800-te chu damdawi lam hmanraw hlui paih danah an fimkhur tawk loh avangin warning a pe a, dan an zawm loh chuan centre kharsakah a vau.

BSPCB chairman Ashok Kumar Ghosh chuan heng centre-te hi district paruk chhunga mi an nih thu sawiin, an hmanrua paih danah dan siamte chu an zawm lo tih a sawi. Ni 15 chhunga Common Bio-medical Waste Treatment Facilities (CBWTF)-a an hmanraw hman hluite an paih loh chuan, BSPCB chuan centre kharna tur thupek hi a tichhuak dawn niin a tarlang.

Hei bakah hian power distribution company-te hnenah pawh board hian dan zawm lo centre-te hnenan electricity an pek chu titawp turin a ngen bawk ang.

CBWTF hian health centre hrang hranga an hmanraw hlui paihte lakhawm turin motor a tlantir ṭhin a, mahse centre tam tak chuan an bawlhhlawhte hi vantlang hmunah te an lo paih mai ṭhin a ni.

BSPCB scientist Dr Naveen Kumar chuan healthcare centre-ten bawlhhlawh paih chungchanga dan siamte an zawm ṭhat loh chuan, an bul vela mihringte hriselna leh environment lam tan pawh a pawi thei tih a sawi. "State chhunga medical establishment zawng zawng chu bio-medical waste management rules, 2016 zawm vek tura phut an ni. Dan zawm lo chu thil sual pawi tak ti anga ngaih an ni," a ti. Board chuan state chhunga hosptial, nursing home leh medical establishment hrang hrangte chu an bawlhhlawh paih danah fimkhur leh, dan zawm ṭha tura a hriattir fo thu a sawi.