India ramah Covid-19 kai nuai 14.83 chuang awm tawh
Ministry of Health and Family Welfare-in nimina report a tihchhuahah Covid-19 kai hmuh chhuah thar 47,703 an awm leh a, hri len ṭantirh aṭanga nimin thleng khan mi 14,83,156-in hri an kai tawh.
Hri kai dama puan thar mi 35,175 lai awm lehin enkawl dam 9,52,743 an awm tawh a, enkawl dam rate hi 64.23% a tling tawh a ni. Hri kai mek 4,96,988 la awmin, darkar 24 chhungin thihpui mi 654 an awm leh a, India ramah Covid-19 vanga thi 33,425 an awm tawh a ni.
Indian Council of Medical Research (ICMR) chuan ni hnih chhung a zawnin sample nuai nga chuang an test ta a, nimina report an tihchhuahah hian Covid-19 sample 5,28,082 an test leh a ni. Hei nen hian hri len ṭantirh aṭang khan sample 1,73,34,885 an test tawh. ICMR hian ramchhung hmun hrang hrangah laboratory pawmpui 1,310 a nei tawh a, chung zinga 905 chu sorkar laboratory niin 405 chu private laboratory a ni bawk.
India ram khawpui Delhi chu State leh UT zinga recovery rate san berna an la ni zel a, 88.68% lai an dam tawh. Ladakh, Haryana, Assam leh Telangana-ahte chuan enkawl dam rate hi 75% aiin a sang bawk a ni. Mumbai-ah hri kai hmuh chhuah tlem ber ni Thawhṭanni khan Mumbai khawpuiah sample 8,776 test zingah 700 in Covid-19 an kai tih hriat a ni a, hei hi ni 100 chhunga Mumbai-a ni khata hri kai hmuh chhuah tlem ber ni a ni. Mumbai khawpui bikah hian hri kai hi hmuh chhuah hi 1,10,182 awm tawhin a tam zawk enkawl dam an ni awh a, enkawl mek hi 21,812 an la awm. Khawpui chhunga hri kai hmuh thar zat hi a tlahniam ṭan a, hetih lai hian khawpui chhehvelah hri kai hi an la pung chak hle thung.