Professional college 179-in chhunzawm thei lo

All India Council for Technical Education (AICTE) chuan Thawhṭanni khan India rama professional college 179-in academic year 2020-21 an chhunzawm thei dawn lo tih a tarlang. 

Heng professional college zingah hian engineering college leh business school-te pawh a tel. Academic year 2020-21 an kal theih dawn loh chhan hi Covid-19 hri leng vanga lockdown puan a nih avang leh college-a hna lak tlem a nih tak vang a ni tiin AICTE chuan a tarlang bawk. 

Professional college kal chhunzawm thei lo te hi kum kaw hnua kal thei lo tam ber ṭum a ni a, academic year 2019-2020 a kal chhunzawm thei lo aiin a let hnihin academic year 2020-21 an tam zawk. AICTE chuan institution 134 vel chu academic year 2020-21 an chhunzawm thei dawn em tih sorkar aṭanga phalna an la lak loh thu a tarlang.  Covid-19 hri lengin ram chhunga zirna in nasa takin a nghawng chho mek tih a takin a lang ṭan nia ngaih a ni. 

Zirna in kal chhunzawm thei lo hi tam viau mah se, academic year 2020-21 ah institution thar 164 chu AICTE chuan pawm an nih thu a tarlang. Academic year 2020-21-a AICTE-in a pawm institution 9,691 aṭangin seat 30,88,512 a awm thei dawn a, institution zingah hian engineering leh business school-te an tel.