EC-in J&K Lt. Governor thusawi sawisel

Jammu and Kashmir Lieutenant-Governor GC Murmu-a'n J&K-a inthlan neih hun tur chu deli­mitation exercise kalpui mek zawh hunah a ni chauh ang tia a sawi chu Elec­tion Commission of India chuan chhang letin, inthlan neih hun tur chu EC chauhin a rel thei a ni, a ti. 

J&K sorkar a tlak hnuah kum hnih chhungchu inthlan neih a ni tawh lo a ni. Nikum August thla khan  BJP kaihhruai NDA sorkar chuan J&K tana special status pekna, Article 35A chu titawpin,  J&K state chu ṭhiatin Union Territory pahnih, Jammu and Kashmir leh Ladakh-ah a ṭhen zui bawk. Sorkar laipui thiltih dan sawiseltu leh dodaltu political  leader eng emaw zat chu hren zui an ni. 

Lt Governor-in inthlan neih hun tur chungchangah chuan EC chuan thuchhuah siamin, inthlan neih hun tur hi EC ni lo midang chuan lo sawi ve lo tura an duh thu a tarlang.  Inthlan buatsaih dawn hian thil tam tak ngaihtuah ngai a awm thute sawiin, khaw chin awm dan te, ram chhung boruak awm te, tualchhung mipuite dinhmun thlenga ngaihtuah a ngai a ni, a ti. Hemi rual hian tunlaia coronavirus leng mek chu ngaihtuah tel a la ngai leh bawk a ni, tiin a sawi.