Vawiinah Rafale fighter jet lo thleng dawn

Hun rei tak India-in a lo nghah tawh, Indian Air Force te hman tura France hnen aṭanga a lei, Rafale fighter jet batch hmasa ber panga chu tukin zing hian India a rawn thleng dawn. 

Thawhṭanni khan Rafale fighter jet pangate chu France-a Bordeaux khuaa Merignac airbase aṭangin an rawn thlawk chhuak tawh a, nimin khan United Arab Emirates (UAE)-a French airbase-a fuel an thun hnuah tukin zing hian Haryana-a Ambala district-a Air Force Station-ah an rawm ṭum dawn a ni. 

India leh France hian September 2016 khan Rafale fighter jet 36 lei tur hian inremna an siam a, an inremna hi cheng vbc 58,000 vel a ni. Tukina rawn thleng tur bakah hian a dang panga pawh a rawn thlen belh leh thuai dawn bawk. Lo la thleng lo pangate hi France-ah training tir rih an ni. Kum 2021 kum tawp lamah chuan jet 36 India-in lei a tum hi lei fel hman tawh tura ruahmanna kalpui mek a nih thu France-a Indian embassy chuan a tarlang. 

Dassault Aviation siam Rafale jet hi Ladakh-ah dah tumna a awm thu official ṭhenkhat chuan an sawi tih media-te chuan an tarlang a, official-te chuan Rafale jet hi Indian Air Force-in indo an neih ṭuma an hman ṭangkai dawn thu leh an ralthuam neih pawh a phuisui phah sawt tur thu an sawi. Rafale jet 36 zinga 30 chu fighter jet a ni a, a dang paruk chu trainer jet a ni thung. Trainer jet hian seat pahnih a nei a, fighter jet a awm zawng zawng ang chu a awm ve deuh vek a ni.